हिन्दू जगतमा सुसमाचार सुनाउँदा के-के कुराहरूमा ध्यान दिने? || भाग ३

byAn Explorer! 3/23/2025 05:00:00 PM

१) ज्ञान, भक्ति र कर्म मार्गलाई यसरी पनि हामी जोड्न सक्छौँ:-
ज्ञान मार्ग - येशू नै परमेश्वरको ज्ञान हुनुहुन्छ । उहाँले नै परमेश्वरलाई प्रकट गराउनुभयो र वचनका गहिराईलाई बुझ्न मद्दत गर्नुभयो ।
भक्ति मार्ग - येशूले आफ्नो जीवनकाल भर परमेश्वरको भक्ति सही तरिकाले गर्नुभयो । आत्मा र सत्यतामा परमेश्वरको आराधना गर्नुपर्छ भनी उहाँले सिकाउनु भयो ।
कर्म मार्ग - येशूका कार्यहरू सिद्ध थिए । उहाँ माथि कसैले पनि पापको दोष लगाउन सकेनन् किनकि चोरले चोरलाई चिन्छ भने झैँ पापीले पापीलाई । उहाँको जीवन उच्च नैतिकताले भरिएको थियो ।

२) हिन्दू धर्म सम्बन्धि इतिहास बारे कुनै पनि चर्चा नगर्नुहोस् । यसले केही लाभ दिँदैन । यस बारे विविध मतहरू व्याप्त छन् र निकै विवादित रहेको पाइन्छ । सिन्धु घाटी सभ्यता, आर्य सिद्धान्तहरू आदि विषयवस्तुहरू माथि कुनै चर्चा नगर्नुहोस् । बरु यसका दर्शनहरू बारे चर्चा गर्न सकिन्छ ! शद-दर्शन: वेदान्त, योगा, सांख्य, मिमान्सा, न्याय र वैशेशिखा ।

३) हिन्दू मित्रहरूमा हाम्रो विश्वास बारे केही गलत अवधारणाहरू फैलिएको छ भने त्यसलाई स्पष्टीकरण दिनुहोस् । प्रायः सामाजिक संजालका कारण धेरै अफवाहहरू उहाँहरू समक्ष पुगेको पाइन्छ । केही उदाहरण: इसाईहरूले डलर खान्छन्, येशू भारत र नेपाल आए, येशूका पिता कृष्ण थिए, येशू कश्मिरमा मर्नुभयो र उहाँको चिहान त्यहाँ छ आदि । यी गलत अवधारणाहरूले सुसमाचार माथि तगारो थप्न सक्छन् र बाइबल अनुसार हाम्रो जिम्मेवारी अरुलाई सही बाटो देखाउनु पनि हो !

४) आफ्नो गवाही र साक्षी दिनुहोस् तर त्यसैलाई मात्रै केन्द्र बिन्दु नबनाउनुहोस् ! आश्चर्यकर्मका कुराहरू कति त हिन्दू आस्था भित्र पनि रहेका हुन्छन् ! येशूलाई भौतिकी उपलब्धिको दाताको रूपमा नदेखाउनुहोस् । तपाईं हामी समृद्धि (prosperity gospel) को सुसमाचार प्रचार गर्न आएका होइनौँ । येशूमा चङ्गाई छ भनी धेरै यसैमा मात्रै ध्यान केन्द्रित नगर्नुहोस् । यो हाम्रो विश्वासको मूल सिद्धान्त होइन । यसले झन विवादित प्रश्न आज निम्त्याएको छ जस्तै: कोरोनाको बेला चङ्गाई किन भएन? किन धेरै इसाई समुदाय नै आज बिमारी अवस्थामा छन् ? आदि ।

५) झूटा समूह बारे उनीहरूलाई बुझाउनुहोस् । धेरैले झूटा शिक्षा र शिक्षकलाई भेटेका हुन्छन् र हाम्रै बगाल ठानेका हुन्छन् । उनीहरूलाई बुझाउनुहोस् कि जसरी हिन्दू धर्म भित्रै पनि कति भ्रामक शिक्षा दिनेहरू छन् त्यस्तै इसाई समुदाय जस्तै देखिने ठगाहा समूहहरू पनि छन् । उनीहरूलाई जगत गुरु कबिरको उदाहरण दिन सकिन्छ जसको पुस्तक ज्ञान गंगा निकै लोकप्रिय बन्दैछ । यस्तै हाम्रो समुदायमा पनि निकै छन् जस्तै: सच्चाई केन्द्र, जेहोवाका साक्षी, मर्मन, चर्च अव अल्माइटी गड, माता येरुसलेम आदि । झूटा शिक्षा बारे आफू पनि जोगिनु र अरूलाई पनि जोगाउनु हाम्रो जिम्मेवारी हो!