हिन्दू जगतमा सुसमाचार सुनाउँदा के-के कुराहरूमा ध्यान दिने? || भाग ४

 

१) उनीहरू सित एकदमै नम्र व्यवहार गर्नुहोस्, प्रेम गर्नुहोस् ।* महात्मा गान्धीको सरह टिप्पणी दिने मौका उनीहरूलाई नदिनुहोस् ! "मलाई तिम्रो ख्रीष्ट मनपर्छ तर तिमीहरू होइन किनकि तिमीहरू उहाँ जस्तै जिउँदैनौँ" । हामी पवित्र आत्माको फलले भरिनपर्छ । हाम्रो विश्वासको लागि सबैभन्दा ठूलो तगारो भनेकै हाम्रो व्यवहार हो! कत्तिले त यसकै कारण पनि बाइबल पढ्न सम्म मान्दैनन् ।

२) उनीहरू कथा-कहानी सुन्न मन पराउँछन् । उनीहरूका पुराणहरू प्रायः कथाहरूले भरिएका हुन्छन् । ती कथाहरूमा शिक्षाहरू हुन्छन् । तपाईले बाइबलका कथाहरू बताउन सक्नुहुन्छ, फिल्म देखाउन सक्नुहुन्छ । सुसमाचारका लागि जतिसक्दो प्रयास गर्नुहोस् ।

३) समान- अवधारणा खोज्नुहोस् र फरकपन तर्फ विस्तारै लैजानुहोस् । ईश्वर सर्व ज्ञानी, सर्व व्यापी र सर्व शक्तिमान छन् भनी हामीले भनिरहन पर्दैन । प्रायः हिन्दू समूहहरू यस कुरामा अनभिज्ञ छैनन् । यसलाई पुल बनाई ईश्वर सम्बन्धी बाइबलको अवधारणालाई पेश गर्नुहोस् । त्यस्तै ईश्वर मानव चोला लिई आए पनि हामीले भन्न पर्दैन किनकि प्रायः हिन्दू जगतमा अवतारका कथाहरू प्रबल छन् जस्तैः विष्णुका दस अवतार । येशूलाई शुरुमा अवतार को रूपमा चिनाउँदै उहाँको फरकपन तर्फ डोर्‍याउने काम गर्नुहोस् । अक्सर येशूलाई पनि उनीहरूले आदर गर्छन् नै तर उहाँलाई एक गुरु वा अध्यात्मिक मार्ग निर्देशकको तहमा राख्छन् । येशू वास्तवमा को हुनुहुन्छ भनी बुझाउँदै गर्नुहोस् ।

४) उनीहरूलाई चर्च आउनलाई निमन्त्रणा दिनुहोस् तर जबर्जस्ति चाहिँ नगर्नुहोस् । उनीहरूका निम्ति निरन्तर प्रार्थना गर्नुहोस् । धेरैलाई चर्चको वातावरण र भाषा अजीब लाग्न सक्छ ! हिन्दू मन्दिर सरह जस्तो नहुँदा उनीहरूलाई असहज महसुस हुन्छ । अक्सर उनीहरू टिभीमा देखाइने क्याथलिक चर्च प्रति चाहिँ बढी आकर्षित हुन्छन् । त्यसैले उनीहरूलाई शुरु मै चर्चमा लैजान हतार नगर्नुहोस् र चर्चमा ल्याइएको दिन उनीहरूलाई स्वागतको वयवस्था मिलाउनुहोस् र ख्रीष्टको प्रेम देखाउनुहोस् ।

५) मूर्तिपूजा बारे कुनै पनि नकारात्मक टिप्पणी नगर्नुहोस् । मूर्तिपूजाको अर्थ खास गहिरो र रोचक छ । यसलाई इसाई समुदायमा हल्का र नकारात्मक किसिमले मात्रै लिइने गरिन्छ तर यसको आफ्नै औचित्य र अर्थ भने बेग्लै छ । यस बारे जान्नका लागि Michael Heiser का भिडियोहरू हेर्न सक्नुहुन्छ ।

*टिका लगाउने र प्रसाद खाने विषयमा पनि उनीहरूको गुनासो अक्सर धेरै सुनिन्छ | छोटकरीमा भन्नपर्दा टिका र प्रसाद खास मोक्ष सित नै सम्बन्धित छन् | हामीले उनीहरूलाई येशू चिनाउन आएका हौँ जसले गर्दा उनीहरू कै मोक्ष मार्गमा संस्कृतिको नाउँमा भएपनि संलग्न हुनुहुँदैन | यद्दपि मर्यादित ढंगले उनीहरूलाई सम्झाउन सक्छौँ! 'हुँदैन' शब्द भन्दा पनि 'लगाउँदैनौं/ खाँदैनौं' जस्ता शब्द प्रयोग गर्दा उचित हुन्छ | यसका लागि कृपया यी ब्लगहरू पढ्नुहोला:

१) हामी किन टिका लगाउँदैनौं: Click!

२) प्रसाद किन खाँदैनौं: Click!

थप अध्ययन सामग्रीहरू:

१) के येशू गुरु हुनुहुन्छ? Click!

२) येशू एक शिक्षक: Click!

३) मूर्तिपूजा बारे: Click!