उहाँको यू ट्यूब: यहाँ!
नेपाली ख्रीष्टियन जगतमा सायद भोजराज भट्ट
जस्ता बाइबल शिक्षक विरलै पाइएला जसले बौद्धिक र क्यारिज्म्याटिक विश्वासलाई एकदम
वचनको आधारमा रहेर सन्तुलित ढंगले व्याख्या गर्ने गर्छन् | केही समय देखि पवित्र
आत्मा, वरदान, बौद्धिक विश्वास, अन्य भाषा जस्ता जटिल र ख्रीष्टियन जगतलाई नै
हल्लाउने खालका विषयहरूमा उहाँ बोल्दै आउनुभएको छ | पक्का पनि यो पेन्तिकोस्तल र
क्यारिज्म्याटिक मण्डलीहरूका लागि लाभदायिक कुरो हो |
बौद्धिक विश्वास, आत्मिकी अतिवाद, क्यारिज्म्याटिक
अतिवादी गतिविधि, अन्यभाषा, चंगाई, पवित्र आत्माको भरपूरीका विषयहरूमा उहाँले एकदम
सन्तुलित एवं व्यवहारिक तवरले शिक्षाहरू ल्याउन थाल्नुभएको देखिन्छ | हुन त यस
पछाडी उहाँको आफ्नै व्यक्तिगत अनुभवले पनि धेरै जोश, हिम्मत, निश्चयता र जाँगर
दिएको हुन सक्छ | एक बाइबल शिक्षक र बौद्धिक विश्वासको खाँचोको पक्षमा बोल्नुहुने
प्रभुका जन आज क्यारिजम्याटिकहरूलाई पिरोलिएको विषयहरूमा पनि आफ्नो आवाज उठाउँदै
हुनुहुन्छ | पवित्र आत्माको औचित्य, उहाँको काम, उहाँको भरपूरीको खाँचोको विषयमा
उहाँले निकै गहकिला र वचनमा आधारित शिक्षाहरू ल्याउँदै हुनुहुन्छ जुन सबै प्रभुका
जनहरूका लागि नितान्त आवश्यक छ |
मेरो आफ्नै जीवन यस्ता धेरै असल शिक्षकहरू
देखेको छु (नेपाल भित्र र बाहिर दुवै) तर जुन विषयमा उहाँ बोल्नुहुन्छ त्यसमा
उहाँको अब्बल ज्ञान र विशलेषण देख्न पाइन्छ | उहाँ केवल आफ्नै अनुभवको आधारमा ढिपी
गर्नुहुन्न तर वचन द्वारा पनि त्यसलाई विशलेषण गर्नुहुन्छ | बौद्धिक र
क्यारिजम्याटिक दुवै क्षेत्रहरूलाई ख्रीष्टियन जीवनको एक अपरिहार्य यात्राको रूपमा
उहाँले यस विषयलाई हेर्नुभएको छ | जुन किसिमले आज मण्डलीमा पवित्र आत्माको नाउँमा
गोलमाल मच्चिएको छ, यहि विषयमा साठीक तवरले निष्पक्ष रही उहाँले आफ्ना शिक्षाहरू
दिनुभएको पाइन्छ जसका कारण म स्वयम् पनि धेरै आशिषित भएको छु |
क्यारिज्म्याटिक र बौद्धिक क्षेत्रहरू
शत्रुतामा यात्रा गर्ने क्रम जारी रहँदा, उहाँले यी दुवै पक्षलाई सन्तुलन र
मिलापमा लैजाने अद्भुत काम गर्दै हुनुहुन्छ | कति पल्ट, क्यारिज्म्याटिक जगतका
प्रभुका जनहरूले बौद्धिक वा सैद्धान्तिक जगतका विश्वासीहरूको आलोचनालाई बाइबलीय,
तार्किक एवं मर्यादित ढंगले सम्बोधन गर्न सकिराखेका हुँदैनन् | अनुभव र पवित्र
आत्माको शक्तिको विषयमा कुरा गर्दा वचन द्वारा उनीहरूले आफ्नो अनुभवलाई तौलन
सकिराखेका हुँदैनन् | यस्तै, बौद्धिक समूहले पनि सिद्धान्तको खाँचो र सबै आत्मालाई
जाँच्न पर्ने आवश्यकता र वचनलाई नाघ्न नहुने कुरामा क्यारिज्म्याटिक क्षेत्रका
विश्वासीहरूलाई बाइबलीय, तार्किक एवं मर्यादित ढंगले सम्झाउन, बुझाउन र विशलेषण
गर्न सकिराखेका हुँदैनन् | सायद यहि कारणले आज नेपालि मण्डलीहरू तनावग्रस्त स्थितिमा
रहँदै आएका छन् | बप्तिस, रिफर्मड, प्रेसबीटेरियनहरूले पेन्तिकोस्तल ए.जी र क्यारिज्म्याटिक
मण्डलीहरूलाई घोचपेच गर्ने, बिरोध गर्ने, झूटा सेवाकाईको दर्जामा हेर्ने, आलोचना
गर्ने दृष्टिले हेर्दछन् भने पेन्तिकोस्तल समूहहरूले पनि अर्को समूहलाई पवित्र
आत्मा नै नमान्ने मण्डलीको नजरले हेर्दछन् र भक्तिको भेष धारण गर्ने तर त्यसको
शक्तिलाई इन्कार गर्ने समूहको दर्जामा राख्दछन् |
आजको विकराल स्थितिमा यी दुवै पक्षलाई राम्रो
सँग सम्बोधन गर्न नसक्दा नै परिस्थिति झनै बिग्रिदै गएको अवस्थामा छ | पा. भोज राज
जी ले हालसाल गरिरहनुभएको काम निश्चय नै आशिषमय छ | दुवै पक्षलाई मर्यादित, बाइबलीय,
ऐतिहासिक एवं व्यवहारिक नजरले कसरी विशलेषण गर्ने भन्ने कुरा उहाँबाट सबैले सिक्न
आवश्यक छ | उहाँ कुनै एक समूहको निम्ति आवाज हुनुभएको छैन तर जे कुरा सत्य छ,
बाइबलीय छ, महत्त्वपूर्ण छ, व्यावहारिक छ त्यहि कुराको आवाज हुँदै आउनुभएको छ |
.png)
.png)
0 Comments