मैले खोजेका उत्तरहरू || बाइबलीय तथा ईश्वरशास्त्रीय प्रश्नोत्तरहरू || विजय लुंगेली मगर

 

ख्रीष्टियान जीवन केवल विश्वास गर्ने मात्रै जीवन होइन तर परमेश्वरलाई अझै चिन्दै जाने र उहाँ सँगको हिँडाईमा अझै गहिरिने जीवन हो । यो नै ईश्वर शास्त्रको उद्देश्य हो । आजको युगमा पहिले भन्दा पनि धेरै प्रश्नहरूको बोझ बोकेर हिँड्ने विश्वासीहरू मनग्ये छन् । उनीहरूको जिज्ञासालाई सम्बोधन गरिनुपर्छ । भर्खरै मात्रै प्रकाशनमा आएको यस पुस्तकले धेरै नै योगदान दिन सक्छ भन्ने मलाई लाग्छ ।

यो पुस्तक आम विश्वासी र ईश्वर शास्त्रमा केही हदसम्म रुचि राख्नेहरूका लागि उपयोगी देखेको छु । विशेषगरी किशोर-किशोरी र युवाहरूलाई यो पुस्तक बाइबल अध्ययनमा निकै लाभदायक हुन सक्छ । यस पुस्तकमा जम्मा २४२ वटा बाइबल भित्र र बाहिरका एकदमै गहकिला प्रश्नहरूको सङ्गालोलाई बडो रोचक ढङ्गबाट प्रस्तुत गर्दै तिनीहरुको सरल उत्तर दिन खोजिएको छ । 

लेखक निकै प्रतिबद्ध भएर यस पुस्तकलाई यसरी बजारमा ल्याएका छन् । मलाई लाग्छ विश्व प्रसिद्ध साइट got questions बाट प्रेरणा बोक्दै उनले आफ्नै जीवनका अनुभवबाट प्रश्नहरूलाई नोट गर्दै एउटा पुस्तकको रूप दिएका छन् । यस्तो प्रेरणा र अनुराग सायद आजको युगका युवाहरूमा हुन पर्ने हो । पुस्तकमा विविध सरल देखि जटिल प्रश्नहरूलाई समेटिएको पाइन्छ । कतिपय विवादास्पद साथै व्यावहारिक प्रश्नहरूलाई पनि सन्तुलित ढंगले सम्हाल्दै उत्तर प्रदान गरिएको पाइन्छ । जे होस्, ईश्वर शास्त्रमा बिगिनरहरूलाई चाहिँ यो पुस्तक फाइदाजनक नै पाउँछु यद्यपि अध्ययनको यात्रा जारी राख्ने काम सबैको आम जिम्मेवारी हो । 

हरेक कुराको कमीकमजोरी हुन्छ भने जस्तै लेखकले यस पुस्तकमा अझै काम गर्न पर्ने देखिन्छ । स्रोतहरूको अझै कमी देखिएको छ भने लेखक ईश्वर शास्त्रीय जगतमा भइरहेको अपडेट सित परिचीत हुनुहुन्न जस्तो चाहिँ मलाई लाग्यो । अझै पछि आउन सक्ने संस्करणमा आजको मगजले सोध्ने प्रश्नहरू पनि थप्न सकिन्छ भने स्रोतहरू अझै बढाउन सकिन्छ जसले लेखकको उत्तरलाई अझै बलियो पार्न मद्दत गर्छ । यसका अतिरिक्त पुस्तकको अन्त्यमा "index" खण्ड भए अझै सजिलो हुने थियोे जस मार्फत पाठकले आफूले खोजेको विषयलाई पत्ता लगाउन सक्षम हुन्थे । अनि हरेक प्रश्नको उत्तर पछि थप अध्ययनको एउटा सानो भाग भए अझै राम्रो हुने थियो जसमा लेखकले लाभदायक स्रोतहरू वृहत् अध्ययनका लागि राख्न सक्थे । जे होस् पुस्तकको प्रयास निकै प्रशंसनीय छ र अझै पनि धेरै सुधार र परिमार्जनका साथ उपयोगी पुस्तकको रूप दिन सकिन्छ । 

यो पुस्तक मण्डलीको जवान, किशोर सङ्गती साथै सन्डे स्कुलमा शिक्षकहरूका लागि निकै उपयोगी देखिन्छ । हरेकले कमसेकम यो पुस्तक किनेर पढून । यसले लेखकलाई प्रोत्साहन पनि मिल्नेछ भने अध्ययन गर्नेहरूका लागि ईश्वर शास्त्रको राम्रो जग पनि बस्नेछ । साथै भविष्यमा यसको अरु भाग र संस्करणको पनि अपेक्षा गर्दछु । प्रभुले लेखकलाई आशिष दिनुभएको होस् र यस पुस्तकले नेपाली समाजका मण्डलीहरूमा धेरै योगदान पुर्याएको होस् ।